魔貓の倉庫

好攰呀~今日食左半日塵，吹左半日風，再加上企左半日，感覺比起上次長跑日更攰呀~

幸好今次無搭錯車，而且仲早到左添，我去到果陣時雖然已經有學生到左，但就仲未見到d工作人員(帶隊老師除外)，過左大約5分鐘之後先見到有人蒲頭。但當我去到召集處報到後都唔夠5分鐘就被人攆左出去~(正確來講係帶2條"靚"去check point到開工)

當我地去到"目的地"後的第一感覺係，好大風；第二感覺係，好凍；第三感覺係；好大塵，因為我地企既位置就係一個十字路口位的隔離，d車不斷係隔離經過想唔食塵都唔得啦~而且我地既位置可以話係最後一關，因為當d學生跑過我地所在的地方後經過完座橋後就會入番會場，所以淨係等佢地開跑，我都已經變被d風吹到傻，再等到佢地跑到埋黎時我已經凍僵左啦~

後來當男甲果組跑完後，我地就開始了種族大遷移(其實佢地一路跑我地已經一路係到遷移緊)不斷向下遷移，一來係為了防止有人跑錯路(真係有人幾乎跑錯，想一路向前跑，好彩截得住)二來係為了逃避風勢，雖然唔差得幾多，不過都好過無呀~

幾經辛苦，終於等到佢地跑完可以番去(我地係最後一批番去的> <)，個陣時已經好肚餓啦(成12點啦~~)但....仲有過頒獎典禮(我忍)，好終於過埋果典禮啦~~~番去食飯，但...番到去已經1點幾，好彩多多幫我留左飯，雖然已經開始凍啦，不過總好過冇得食呀~然後做左唔夠一個鐘，要監考啦~

幸好今次班魔王都算叫做合作，可以好快開到考，不過監考期間真係好眼瞓呀~好想瞓呀~但係邊可以瞓呀~唯有，我再忍......好~~~~收卷啦~ 然後再開工(係開館先真)幸好，今日無風無浪有到收工時間。

跟住當然放工，食飯，返學，上堂，睡魔急Call..........，正當我打算要同睡魔卿卿我我之際，突然被Miss嚇醒.............

終極結論係，
1. 今日我同睡魔好似有緣無份，算啦~唔緊要橫點我一陣都會見到佢啦~
2. 今日的行程確實真係..............(請自行想像形容詞)

以上就係我今日一日的行程啦，報告完畢~~

p.s.今日都算係有2個收獲ge~
      收獲1：裁判費$80大元(有錢收當然好啦~不過並唔係次次都有)
      收獲2：終於知道原來最近IVE的橋係叫做「翠榕橋」呢個名我都係今日先知，而且仲講左好多次。

p.s.s.今日收到淮考證啦，太好啦第1、2日都係我上面那條邨的中學考，至於Oral就係大圍考，考5:45，今次d考場都算近，唔駛太趕.，真好~

p.s.s.s. (一段對話)
媽媽：我知道點解你咁運滯啦~
魔貓：點解呀~
媽媽：因為你老闆冇比開工利是你law~
魔貓：.............(老闆；即時由短期咀咒名單中轉入長期咀咒名單中)

p.s.s.s.s明天係驚蟄，亦即係"打小人"的日子，身為炎黃子孫當然要下節啦~
咁啱前排就比我搵到一個好應節的活動"打小人"有興趣就去睇下啦~(未被我知道有人打我小人呀~如果唔係我會十倍奉還ga~最近真係積聚好多怨氣呀~~)